welcome

Top

理想VS現實 — 讀書篇

相信大家讀緊中學嘅時候, 對大學生活都會充滿想像,一切都十分美好,但現實又點會咁如意?今日小編就同大家分享下喺大學讀書嘅現實嘅狀況! (戴定頭盔先,以上內容純粹個人/朋友經歷,不能以偏概全) 希望唔會令大家幻想破滅啦。

1.大學唔洗讀書?

入咗大學就唔洗讀書㗎啦!
細細個係咪畀人呃得多呢, 小編喺度話你知係假㗎! 入到大學照樣要交assignments、要考試。如果想攞到好成績,就更加要努力溫書。
不過大學自由度好大,冇人會逼你温書。 而且, 入到大學有好多機會去嘗試唔同嘅活動。 所以分配幾多時間去讀書,就因人而異啦。

2.Timetable任我排

上到大學可以自己reg科,上堂定day off任我揀!
你以為可以完全控制自己個timetable?咁實在係太天真啦。好多時,大學會預先幫你reg咗一啲必修科目,有剩餘嘅學分,你先可以自由決定。
一般嚟講,畢業後有專業資格嘅大學programme,例如: 護理學、物理治療等, 大學規定嘅必修科目比較多,所以可以自由選擇嘅學分都相對較少。
Timetable真係唔係任你排㗎。

3.可以成日走堂

入到大學唔洗tick attendance,咁咪可以成日走堂?

的確有時lecture(即係教授對住成大班人喺演講廳授課嘅堂) 係唔take attendance。但有一部分課堂,例如:

1- tutorial: 一般由teaching assistant授課,比較interactive,例如會有group discussion

2- laboratory: 讀同science相關嘅課目,會有課堂專門比學生進行實踐,例如設計實驗。

呢啲課堂好多時都會計算出席率,所以最好都係要上堂呀。

4.有成班friend一齊返學

中學可以每日同成班friend一齊返學,但入到大學就要學識自己獨處……

大學冇一個固定嘅返學時間 ,就算讀緊同一科,每個人嘅timetable都可以唔同,所以好難無時無刻都會有成班friend陪住你。

小編第一個學期都好唔習慣得自己上堂同食飯,但過一排就會習慣,並發掘到一個人嘅樂趣同好處!

當然,如果有friend可以一齊返學,就真係要好好珍惜呀~

5.大學淨係要讀主修科

入到大學,終於可以擺脫中、英、數、通識?

唔係㗎! 無論係邊個大學課程,除咗你自己嘅主修科目 ,都會包含一定數量嘅大學必須科目,例如: 中文、英文、通識等。

呢啲科目嘅內容一般同自己嘅主修科目關連唔大,但要符合畢業資格,就一定要修讀!

相信必修科目嘅多寡都係選擇大學嘅因素之一,所以 大家可以預先做定資料蒐集呀。

Post a Comment