welcome

Top

在學校遇到的10種人

1.學霸

指一啲讀書叻嘅人。呢種人一般鍾意坐頭兩行,每次上堂都可以極度集中,notes寫到密密麻麻,同佢做朋友就唔洗驚聽漏書啦!不過,自尊心亦都特別強,尤其是喺成績方面。小編曾經見過一個學霸因為考試爭1分滿分,就搞到眼濕濕!所以,要小心唔好觸碰到佢哋嘅地雷呀。

 

2.校隊代表

呢種人通常都係走健康陽光路線,無論係男定女,都幾受人歡迎。但因為成日要去練習同比賽,所以迫不得已要成日走堂,可能仲會miss咗啲重要活動,例如:學校旅行,有時想見佢哋一面都難。

 

3.學渣

有學霸就當然有學渣啦。當學霸們喺度鬥高分嗰時,佢哋嘅日常就係睇邊個最低分。成績對於佢哋嚟講只係一片浮雲,返學只係志在同班friend一齊玩。勤力dd嘅話,一到測驗考試就會臨急抱佛腳,如果唔係分分鐘連書都唔會睇呀!

4.肥仔

每一間學校都會存在住一個幽默有趣嘅肥仔,佢好識得搞氣氛,為大家帶來歡樂。而且仲係一個專業食神,跟住佢出去玩,就唔驚冇啖好食啦! 不過,千祈唔好睇少佢呀,分分鐘係潛力股啊,十年之後見番佢,可能變咗彭于晏咁靚仔㗎~

5.情侶

講起學校生活,又點少得校園情侶。佢哋日日都糖黐豆咁,無論去到邊都會見到佢哋喺埋一齊。有時仲會公然放閃,真係咪話唔令人討厭。不過,最慘係萬一佢哋分咗手,返學都要照常撞口撞面,真係諗起都尷尬。

6.邊緣人

每班總有啲存在感極低嘅人,平時只會自己靜靜咁坐係角落,就算有班會活動都唔多參與。佢哋好似活喺只有自己嘅世界,從來唔會主動同人溝通,所以可能成年都唔會同佢講到一句嘢。誇張啲講,最後可能畢業嗰時都唔會記得佢個名……

7.是非精

佢擁有龐大嘅情報網,每日都收集到嚟自五湖四海八卦消息,日常愛好就係周圍同人搬弄是非。雖然畀是非精亂爆自己嘅八卦真係會好嬲,但無可否認佢嘅八卦新聞會為無聊嘅校園生活增添少少趣味呢。

8.擦鞋仔

有啲同學佢哋會被老師譽為”乖學生”,原因就係佢哋好識得擦鞋! 無論發生咩事,都會覺得”老師永遠是對的”,有時仲可能會向老師篤背脊添。不過大家都話學校係社會嘅縮影,有時市儈少少可能先係生存之道。

9.娘娘

佢一係天生麗質,一係好識得揣摩心理。無論去到邊都會有人主動”服侍”,例如,朝早從來唔洗自己買早餐,粗重野點都會有人幫佢做,有時買野都唔洗自己畀錢。 佢嘅生活聽落好似好正咁,所以自然會引嚟好多閑言閑語啦~

10.班會活躍分子

佢哋好熱衷於參與,甚至籌備班會嘅活動,無論係決定學校旅行去邊到,定係歌唱比賽表演啲咩,只要係班嘅事,佢哋都會主動企出嚟畀意見。佢哋嘅出現增添咗班內嘅凝聚力,令校園生活更多姿多彩。

Post a Comment